అదే సమయంలో ఆశ్రమానికి విదేశీయుల రాక పెరగడం, ఆశ్రమంలో అంతర్గత కుమ్ములాటలు తారస్థాయికి చేరడంతో పాటు రజనీష్‌పై హత్యా ప్రయత్నం జరగడంతో అక్కడి నుంచి ఆయన అమెరికాకు మకాం మార్చి, రజనీష్‌పురం పేరుతో ఆశ్రమాన్ని నిర్మించి, అన్ని మతాలను వ్యతిరేకిస్తూ చేసిన ఆయన ప్రసంగాలు ప్రపంచంలోనే అతి పెద్ద మతమైన క్రైస్తవ మతం పునాదుల్ని కుదిపేయడంతో ఆయనపై నమోదైన అనేక కేసులు ఆయనను జైలు పాలు చేయడంతో పాటు, చివరికి ఆ దేశం వదిలి మాతృదేశానికి వచ్చేసే పరిస్థితులు ఆయనకు కల్పించాయి.

అక్షరం సత్యమైతే మాట వేదమవుతుంది. మనిషికి జ్ఞానోదయమైతేనే అక్షరం సత్యమవుతుంది. అందుకే జ్ఞానోదయం పొందిన ఓషో చెప్పిన ప్రతి అక్షరం సత్యమైంది, ప్రతి మాట వేదమైంది.

ఓషో భాష మైమరపించే హిప్నాటిక్‌ లాంగ్వేజ్‌. ఆయన చెప్పిన నాలుగు మాటలు వింటే చాలు మనకు మైకం కమ్మేస్తుంది. ఆయన చెప్పే విషయంలో ఎంత సాంద్రత ఉంటుందో, ఆయన చెప్పే విధానంలో అంత సరళత ఉంటుంది. ఓషో చర్చించని అంశం లేదు. ఎలాంటి ఊగిసలాట లేని ఆయన మాటల్లో సత్యం చాలా సరళంగా సాక్షాత్కరిస్తుంది.

మీలో భయం అంతమైనప్పుడే జీవితం ప్రారంభమవుతుంది. ప్రేమే జీవితం, ప్రేమే దైవం, ప్రేమే సన్యాసం. మరణం తర్వాత జీవితం ఎలా ఉంటుంది? అనేది ముఖ్యం కాదు. మరణానికి ముందు ఎలా జీవించావనేదే ముఖ్యం – ఇలా మనిషి జీవితాన్ని ప్రభావితం చేసే ప్రతి అంశంపైన ఆయన సాధికారికంగా మాట్లాడాడు. వ్యవస్థీకృత మతాలన్నీ ఏమాత్రం జీవం లేనివని, అవి మానవ చైతన్యాన్ని ఏమాత్రం ఎదగనియ్యవని తేల్చి చెప్పిన మహానుభావుడు ఓషో. దేవుడు, మతాలు, ప్రపంచ రాజకీయాలతో వాటికున్న అన్యోన్య సంబంధం; ఆధ్యాత్మికత, లైంగికత, మనిషి చైతన్యాన్ని అవి ప్రభావితం చేసే తీరు; నిజమైన ఆధ్యాత్మిక స్థితి, ధ్యానం, దాని ప్రక్రియలు; వ్యామోహం, మనిషిలోని భయాలు, బలహీనతలు, అవి మనిషికి అవరోధాలుగా ఎలా మారతాయి, వాటిని ఎలా అధిగమించాలి – ఇలా మీరు ఏది అడిగినా దాని గురించి చాలా చక్కగా, సరళంగా, అప్పుడప్పుడు వాటికి ముల్లానస్రుద్దీన్‌ హాస్య కథలను జోడించి, విశాల దృక్పథంతో సమాజిక పరిధులను కూడా అతిక్రమించి తత్వాన్ని బోధపరిచే ఓషో విధానం, సత్యాన్ని దర్శించిన వ్యక్తిపై ప్రకృతి పూలవాన కురిపిస్తుందని సోదాహరణంగా వివరించే శైలి చాలా అద్భుతంగా ఉంటుంది. అలాగే ప్రపంచ తాత్విక చింతనా భావజాలాలలో తమకంటూ ఒక ప్రత్యేకమైన స్థానాన్ని కేటాయింపచేసుకున్న తావో, లావోట్జూ, జెన్‌, కన్ష్యూషియస్‌, బుద్ధత్వ వాదాలను మనకు పరిచయం చేసిన ఓషో శైలి నిరుపమానం. పురాణాలు, వేదాలు, ఉపనిషత్తులు, భైరవతంత్రం, బైబిల్‌, ఖురాన్‌, భగవద్గీత – ఇలా అన్నింటికీ తనదైన భాష్యం చెప్పడం అనితరసాధ్యం.